Tag Archives: claudio grisancich

scarpe zale

suite in-t-un armèr in tredici stazioni

1

un per de scarpe zale-
dio vardi che mancassi!
messe, sì e no, ‘na volta
e forsi gnanca.
per via che ‘l zalo
no’ se porta
tropo de frequente.

2

co piovi no. no de inverno
e d’istà. per pasqua, forsi
la prima domenica, de le palme.
…………………………………
“cristo entra in gerusalemme”
(in scarpe zale).

3

iera un, giacomo,
professor de dirito,
avocato, che ‘l capitava
a scola da l'”aule giudiziarie”
in dopiopeto blu
e scarpe zale.
ghe iera sempre parso estroso
-e un fià sempioldo-
che de matina presto
el ‘ndassi in tribunal
parado de blu scuro
e zalo ovo ai piè!

4

el poderìa anca dàrghele
a chi che no’ ga scarpe.
……………….
el le varda in-t-el armèr:
‘na rabia su ghe monta. ma chi
te vol che gnanca par regalo
se le cioghi?

5

ch’i gabi anca sbrindèi de scarpe
ai piè, i va piutosto scalzi
che mèterse un per zale.
“semo forsi de balo zavaion?”
cussì i li remenassi al dormitorio
publico o su dei frati
co i va ciapar la calda.

6

zalo xe zalo – difizile portar!

7

pur sempre un fià dispiasi,
scarpe cussì,
de no’ poderle meter.
le iera -alora -costade
anca i sui soldi.
con ogi – se vol meter?-
no’ xe gnanca confronto
come rifinidura: ogi se incola!
in quela volta inveze:
cusi e ribati… cusi e ribati…

8

el se ricorda preciso
ancora de’l negozio
(che no’ xe più), de come
la comessa la xe ‘ndada
per ciòrghele in vetrina:
sbassandose in avanti l’orlo
del traverson de drio
se ‘ndà su pian, mostrando
un gran toco de ‘l biano
de le gambe. altri pari
de scarpe mai, dopo, el ga
comprà con più entusiasmo!

9

tingerle, sarìa ‘n’idea!
ma chi e do’ se tingi
ogi
un per de scarpe zale!?

10

“xe un magazin ‘sta casa.
coss’te se tien tuti
‘sti strafanici? aria, papà,
fate più aria, ‘torno: bùtile,
coss’te se intestardissi!
se fossi de rosè ‘ncora vivo
al cine varietà de l’armonia
gnanca per la ridada el doprarìa
‘sto per de scarpe zale!”

11

roberto de rosè a l’armonia:
do nomi messi là dopo nosòmi
quanto tempo che no’ li sentiva;
e proprio lu’, su’ fio, a nominarli.
su’ fio. no’ più ‘l putel
che ‘l se tegniva drento fin
un momento prima, ma, davanti,
‘n omo: le ore del suo viver
za ingombre de ricordi
e nostalgie.

 12

(su’ fio: come lu’, vecio)

13

‘gni sera, spoiandose de solo
sentado su la sponda de ‘l leto,
el parla co’ la molie
come la fossi ‘ncora
la ‘rente distirada:
“coss’ te disi che femo?
se no le go de meter,
le xe solo ‘n intrigo.
e ga ragion tu’ fio: butèmole!”
………………..
mezo giro, el fa,
voltà verso la parte
do’ che la iera (e xe):
“se podarìa risolver
che mi vignissi via
là che te son ti”.

claudio grisancich da poesie. antologia 1957-2002, marietti